كيفية حساب سعر جرام الذهب للعيارات المختلفة

الخميس في تمام الثامنة مساء ، إجتمع الأصدقاء على قهوة " أيامنا الحلوة " بشارع " الترام " في محرم بك بالأسكندرية ، كان برد الليل قارس :

.. تقعدوا جوه ولا بره يا بهوات ؟ سؤال من " زاهي " ، نادل القهوة .

.. لأ ، بره يا " زاهي " .

قالتها خمسة أفواه في نفس واحد ، و كأن حرارة مرح الشباب و سخونة حكاياته الغرامية في الجامعة إستحت أن ترضى لهم بالداخل مكان .

خمسة من طلبة كلية الطب جامعة الأسكندرية تجمعهم صداقة الطفولة حتى وصلوا الى الجامعه معاً . " باسم " لا يتقن و لا يتفنن في شئ في حياته إلا اللعب بالنرد " الزهر " في " الطاولة " أو في لعبة " زوج ولّا فرد " يصفونه أصدقاؤه أنه " مدمن الزهر " .

" سمير " هو الذراع الأيمن ل " باسم " و أقرب الأربعة لقلبة و كاتم أسرارة الخاصة .

" محمد " و " عبد المسيح " شابان قارئان متدينان يحبان المرح و يحبان باقي " الشلة " و الجلوس معهم .

أما " أحمد " ، منافس ل " باسم " في كل شئ ، حتى الحب .

أطلق " باسم " كلمة البداية لتبدأ بها السهرة و هو يسحب كرسي ليجلس :

.. السهرة صباحي النهارده ، و هايكون الحساب كله على " أحمد " النهارده . قالها مبتسماً و اثقاً من قوله .

.. لا ياعم ، أنا ماباكولش من رهان الرهان حرام . قالها " محمد " و أيده فيها " عبد المسيح " بنفس الجمله .

.. اتفضل بقى ، ربنا رزقنا ، بشيخ و قسيس في الشلة . قالها " سمير " ضاحكاً .

ضحك الخمسه لجملة " سمير " . إلا أن " أحمد " رفض مرور جملة الدعوة للهزيمة بلا تعقيب :

.. بلاش غرور ، بدل ما اشيلك المشاريب كلها و سندوتشات كبده معاهم .

.. طيب بلاش لماضه و قول " جوز ولا فرد " ؟ سألها " باسم " و هو قابضاً بكف يده اليمنى على حجر النرد " الزهر " مداعباً الزهر بين أصابعه بهدوء شديد ناظراً في عيني " أحمد " مترقبأ إختياره .

.. جوز !

خرجت من فم " أحمد " و كأنها تخشى برد الشتاء يعييها . تبسم " باسم " و هو يلقي الزهر و هو يتمتم بكلمة واحدة " فرد " و تابعت أعين الخمسة رقصات الزهر على خشبة اللعب و تدلت شفاة " أحمد " و هو ينتظر قرار الزهر لمن يؤيد . فقرر الزهر أن ينتصر لتمتمة " باسم " ، فصاح " باسم " :

.. جهار يك .. جهار يك .. أربعة و واحد يعني خمسة ، جوز دول ولا فرد يابني .

تعالت ضحكة " باسم " و تابع ضحكته :

.. إكتب عندك خمس نقط ، بنص جنية و الحسابة بتحسب .

ثم كرر سؤاله :

.. جوز ولا فرد ؟

جبين أحمد بدأ يعلن عن قدوم موسم الصيف مبكراً ، قطرات عرق بدأت تتواصل ، يمسحها بكف يده اليمنى و يقول :

.. فرد .

.. نزل طقم شاي هنا يا " زاهي  " ، مين هايشيش ياشباب .

قالها " سمير " ، و هو يكمل قائلاً :

.. ياخوانا الواد ده مخاوي ، تحسوا كأنه بيوشوش الزهر يقوله يكون جوز ولا فرد ، شوفوا هايعمل ايه دلوقتي .

تمتم " باسم " للزهر قائلا ، جوز ، ثم ألقى الزهر فكانت ثمانية ، ضحك بصوت مرتفع ، قال " محمد " :

حظك عالي جدا .

.. في الزهر بس !! قالها " أحمد " .

.. عبد المسيح ، ينظر و يقول : " مخاوي ، مالوش حل " .

.. ثانية واحده و اجيلكم . قالها " باسم " واقفاً كمن لدغه عقرب ، و انصرف سريعا عابراً الطريق .

.. رايح فين ؟ " محمد " يسأل بإستغراب .

" سمير " يرد نيابة عن " باسم " :

.. ثواني و يجي يا شباب ، نحكي شوية لحد ما يجي .

.. رايحه فين ؟ " باسم " يسأل السؤال و هو يسير مسرعا خلف " دنيا " ، صديقته في الكلية و تسكن بجوار " باسم " ، لكنها تكبره بثلاثة سنوات دراسية .

.. رايحه درس عند " ميرفت " .

.. درس ايه ؟ ماقولتيش يعني انك بتاخدي درس قبل كده .

.. أيوه ده درس لسه أول مره أروحه النهارده .

.. درس ايه اللي في آخر أسبوعين في الترم ؟!! إزاي يعني ؟!!

.. مش درس درس يعني ، دي مراجعه هايعملهالنا الدكتور " حازم " أنا  و " ميرفت " .

.. دكتور " حازم " !! حازم مين ؟؟!

.. " حازم السرجاني "

.. " حازم السرجاني " ؟؟!!! ، اللي عاوز يتقدم لك ؟؟!!

.. باسم لو سمحت ، ما تخلطش الأمور في بعضها ، أنا كده هاتأخر !

.. خلاص هاستناكي لما ترجعي .

.. أخويا هايبقى معايا ، نتكلم بكره طيب .

توقف " باسم " و توقفت " دنيا " لكن تكلمت عنهم نظراتهم . عاد " باسم لأصدقائه ، لكنه ليس " باسم " السابق ، عاد يستأذن في الإنصراف ، فقال له " أحمد " مازحاً :

.. هاتخلع لما حسيت اني هاكسبك .

تبسم له " باسم " ثم انصرف . أنتظر " باسم " ليوم الأحد يريد أن يفهم سبب الدرس المفاجئ دون علمه ف " دنيا " لم تعتد أن تخفي عنه شئ كبير كان أو صغير .

دخل " باسم " قاعة المحاضرات يستأذن " دنيا " في الخروج لدقائق . سألها :

.. جيتي من غير ماتكلميني كالمعتاد ، و درس غريب من يومين ؟!! في حاجه مش فاهمها ، محتاج أعرف ايه اللي بيحصل.

.. " باسم !! " ، بابا رفض اننا نرتبط ، و رفض انك تقابله و قابل " حازم " و وافق عليه و لما توسلت اليه انه يسمعك و يقابلك رد عليا رد ماعرفتش أقوله ايه .

.. قالك إيه ؟

.. قالي ، " لما يبقى يتشطر و يتخرج يبقى يتقدم لبنات الناس " ، ماعرفتش أرد عليه ساعتها ، أنا قولتلك قبل كده كتير ، انك كده بتهدد مستقبلنا ، و أنا في الأول و الآخر بنت ، مش هاقدر أستنى كتير بعد التخرج لو انت مالحقتش بيا . انت سقطت تلات سنين و الله أعلم هاتخلص ولا لأ .

.. يعني كده خلاص ؟؟ سألها " باسم " و جبينه يتصبب عرق الخجل .

.. عاوزاك تفهمني و تفهم إني ماحبتش حد غيرك ، لكني في الآخر مش لاقيه فيك تمسك بيا ، انك تنجح على الأقل علشاني ، انت كنت بتدخل الامتحانات تهزر و بتراهن ب " الزهر " انك هاتنجح . انت مره قولتلي بالهزار " تراهني اني هاتقدملك و بابا هايوافق " ، فاكر ؟!! قولتلك " حتى الزهر هاتخليه يختار مستقبلنا ؟ "

و السكوت يطبق على شفتي " باسم " . ثم أتبعت كلماتها بسوط من نيران نزل على أذنيه ليكويها ، قائلة " أنا هاتخطب لحازم أول أسبوع في الأجازة " .

.. يا خسارة !! قالها " باسم " و هو يحاول جاهداً منع دمعه من السقوط . و لم تعبر " دنيا " بكلمة ، إلا أن دموع عينيها أبت إلا أن تنعي حباً ظل يكبر طوال سنوات الجامعه .

أنتهت الدراسة و تخرج الأصدقاء كلهم ، ما عدا " مدمن الزهر " . و جاء يوم الزفاف ليرى حبيبة عمره الناضج بين يدي غيره ، و علم أنها ستسافر إلى دولة أوروبية بعد أسبوع عسل ، و لم يستطع أن تفارقه دون وداع . فسأل عن موعد الطائرة ، فاستقل سيارته و اتجه صوب المطار فجرا . اقترب من المطار و هو ينظر من سيارته للمطار من بعيد ليرى طائرة تنطلق من المطار ، فظن أنها تنطلق ، فأطلق لسيارته السرعة بمنتهاها و هو يصعد كوبري المطار ظن أنه يطير بجوارها ، صار ينادي باسمها فرحاً أنه يطير بجوارها ، إلا أنه توقف فجأه ، توقف عن كل شئ ، حتى الحياة . توقف في صندوق سيارة نقل كانت معطلة في مهبط الكوبري .

بعد عشرين عاماً .. في مطعم أسماك في الأسكندرية ، يحاول جاهداً أن يقوم مستنداً على عصاه إلا أن شنطة يد مذهبة تشتبك في رأس العصا و صاحبتها تمر ، فيقع مستنداً على أحد المقاعد بجانبه و تسقط الشنطة على الأرض مخرجة كل مافيها .

.. آسفة جدا مش قصدي . قالتها السيدة صاحبة الشنطة محاولة إنقاذه من إستكمال السقوط .

و يحاول هو التقاط ما وقع من الشنطه ليساعدها في تجميعها مره أخرى ، قائلا :

.. أنا اللي آسف اني ماخدتش بالي و هو ينظر إلى الأرض محاولاً أن يلتقط ما وقع ، فالتقط حافظة النقود ، و محمول ، و مفاتيح و وضعهم في الشنطة ، ثم تسمر و هو ينظر تحت أحد أرجل المقعد الذي يسنده ليرى " حجر نرد " !! مد يده و التقط " الزهر " ثم جاهد نفسه و هي تساعده في الوقوف . و أخيراً تمكن من الوقوف بعد عناء ، أعطاها الشنطة و مد يده بحجر النرد ليضعه في يدها ، فغاص الزهر في يديها و هي تحتضنه مخافة ضياعه ، ثم نظر في وجهها ، مدققاً ، مدهوشاً و هو يعطيها حجر النرد قائلاً :

.. مش ممكن ؟!!! و لسه فاكرة " الزهر " ؟؟!!

.. مش ممكن ايه حضرتك ؟!!

.. مش فاكراني ؟!!

.. مش واخده بالي ، ممكن تفكرني .

.. " سمير " .. " سمير عطية " ، مش فاكراني ؟؟؟!!!!

.. مش معقوووول ، سمير !! إزيك ، عامل إيه ، معلش آسفه اني ماعرفتكش .

تبسم ، ساخراً من نفسه قائلاً :

.. معلش بقى الكبر باين عليا ، خاصة بعد ما العزيز سقط ، و أشار على شعره و تخنت و بعد الحادثة اللي حصلت لي دي .

تبسمت  قائلة :

.. ألف سلامة عليك ، فعلا انت كنت بتعز شعرك جدا و كنت مهتم بيه أوي لدرجة .

ثم سكتت لحظة تحاول أن تسأل عنه ، عن " باسم " ، فاستكملت قائلة :

.. فاكر ، مين اللي كان بيقولك " الشعر مالوش عزيز " .

فارتفع ضحكه لدرجه هيستيريه ، و كأنه رجع بالتاريخ للكلية ، ثم قال :

.. أيوه طبعا فاكره ، الله يرحمه .

صرخةٌ حادة جدا صدرت منها و هي دافعة كفيها مفتوحين على فمها و هي تقول :

.. مين ؟!! تقصد مين .

إرتعشت شفتاه شفقة و خوفاً قائلا :

.. آسف والله ، هو انتي ما تعرفيش ؟؟!!

.. حصل إمتى ؟؟

قال :

.. بعد جوازك بأسبوع كان رايح يسلم عليكي و يودعك ، جالي تيليفون بعدها قالوا انه عمل حادثه عند المطار .

لم تتمالك نفسها من البكاء ، قالت باكية :

.. آسفه ، مضطره أمشي .

و إنطلقت مسرعة و حاول " سمير " أن يصل الى باب المطعم ليخرج ، و عند باب المطعم :

.. إتفضل حضرتك الأول .

قالها شاب يمسك بيد فتاة جميلة تحتضن بعض الكتب بيدها اليمنى ، خرج " سمير " و هو ينظر لهما مبتسماً .

.. تقعدي فين ؟!! الشاب يقول للفتاه و هو يدخل في ممر المطعم .

.. أي مكان ، اللي تحبه .

.. تعالي هنا ، قالها جاذباً كرسي من ظهره لها لتجلس مبتسماً

.. ميرسي . قالتها بنعومة أسرته و زادت من سنه الضاحك .

بعد حوار غير طويل ، قالت الفتاه للشاب :

.. ناويت تعمل إيه ؟

.. هاتقدم لك أول ما أخلص .

.. بابا مش هايوافق .

تأفف من النفي المطلق ناظراً أسفل شماله ، محاولاً تهدئة نفسه بعدم الرد و هو عاقد كفيه تحت ذقنه ، قال مغاضباً :

.. أراهنك أنه هايوافق ، قالها و هو يحرك قدمه اليسرى محاولا صرف حجر صغير من تحت قدمه ، إلا أن لونه إستوقفه ، فمد يده ملتقطه . قال مدهوشاً :

.. زهر عاج أصلي و الأرقام محفوره بمية الدهب كمان !! الفرده التانيه فين ؟؟

قام ليبحث أسفل منه ، قام بالتمشيط أسفل المقاعد فوجد الآخر تحت أبعد المقاعد على اليمين . ضحك قائلا ً

.. ده صاحب الزهر ده شكله كده كان صاحب مزاج و قمرتي محترف كمان . " جوز ولا فرد "

.. يعني ايه ؟؟؟ سألت في اندهاش ، فهم منها أنها لا تعلم ماذا يعني بهذا السؤال .

قال :

.. أقولك أنا خلاص ، أنا هارمي الزهر و الرقمين اللي هايطلعوا لو زوجي يبقى باباكي هايوافق ، و لو طلعوا فردي يبقى مش هايوافق . و ألقى الزهر .

.. بابا رفض يقابلك يا " باسم " .

لم يلتفت لما قالت و هو ينظر للزهر و هو يدور و يتمتم " جوز " و يبتسم عن ثقة منه فيما رمى . إلا أن الزهر رضي بغير ذلك .

.. لأ ، قالها صارخا ، صرخة كأن طائرة كونراد هبطت في صدر المطعم تحطم لها زجاج النوافذ ، و بسرعة فائقة أمسك بمطفأة السجائر و طحن بها الزهر مع كلمة " لأ " الأولى . و حاول الزهر الآخر الهرب خوفاً من الطحن . لكن " باسم " تبعه بصرخة أخرى .

.. لأ ، و طحن بها الزهر الآخر . ثم أتبعها الثالثة .

.. لأ ، فتهشمت للثالثة طاولة الطعام .

خرج يجري و هي خلفه ، قفز على سور الكورنيش ناظراً للبحر و هو يقول :

.. " ماحدش في الدنيا هايمنعك مني و لا هايمنعني منك ، و هاعمل المستحيل علشان أكون أستاهلك ، بس بشرط ، انك تقولي انك هاتستنيني !! "

.. هاستناك للأبد و مش هكون لغيرك مهما حصل .

....................................................................

عادل أنسي